Ճարտարապետությունն այն բացառիկ մասնագիտությունն է, որտեղ միաձուլվում են արվեստն ու ճշգրիտ գիտությունները, փիլիսոփայությունն ու տեխնիկան, շրջակա միջավայրի ու մշակութային ժառանգության պահպանությունը, սոցիալական ու տեխնոլոգիական գործոնները, հոգեբանությունն ու բարքերը, վերջապես, ժամանակի ու ժողովրդի մտածելակերպի դրոշմը:
Ֆակուլտետի կառուցվածքում գործում է 5 ամբիոն՝
- Ճարտարապետության տեսության, պատմության և ժառանգության ամբիոն
- Ճարտարապետական նախագծման և ճարտարապետական միջավայրի դիզայնի ամբիոն
- Քաղաքաշինության ամբիոն
- Գծագրության և համակարգչային գրաֆիկայի ամբիոն
- Գծանկարի, գունանկարի և քանդակի ամբիոն
Ֆակուլտետում դասավանդումն իրականացվում է ինչպես հայերենով, այնպես էլ անգլերենով և ռուսերենով, քանի որ ֆակուլտետի ուսանողների 20-30%-ը ավանդաբար հանդիսանում է արտերկրի քաղաքացի:
Ֆակուլտետն առանձնապես սերտ կապեր է հաստատել Կլերմոն Ֆերանի, Լիոնի, Սենտ Էտիենի Ազգային Բարձրագույն ճարտարապետական դպրոցների, Ֆլորենցիայի Ճարտարապետական համալսարանի, Միլանի պոլիտեխնիկի, Լիսաբոնի ճարտարապետական դպրոցի, Ռուսաստանի Դաշնության մի շարք բարձրագույն ուսումնական հաստատությունների հետ:
Ճարտարապետության ֆակուլտետի շրջանավարտների դիպլոմը 1994թ.-ից պաշտոնապես ճանաչվում է ֆրանսիականին համարժեք:
Ֆակուլտետում ուսումնական գործընթացի արդյունավետության ապահովմանը նպաստում է արդիական սարքավորումներով կահավորված ստուդիա-արվեստանոցների, լսարանների, ինչպես նաև հուշարձանների չափագրման և ախտորոշման լաբորատորիայի առկայությունը:
Ապագա ճարտարապետներ, դառնալով Ճարտարապետության և շինարարության Հայաստանի ազգային համալսարանի ուսանող՝ Դուք վստահորեն կկանգնեք բազմամյա փորձ ունեցող ճարտարապետների կողքին՝ ստեղծելով Ձեր սեփական նախագծերը: Բարեխղճորեն սովորելու դեպքում կդառնաք բանիմաց ճարտարապետներ, այսպիսով շենացնելով մեր երկիրն ու քաղաքը, զարդարելով այն գեղեցիկ ու կարևոր նշանակություն ունեցող կառույցներով:
Սիրելի՛ դիմորդներ, խելամիտ ընտրություն և լուսավոր ապագա ենք Ձեզ մաղթում: