(010) 303-300
Հեռավար եղանակով կայացավ 2020 թվականի «ԳՈՏԻ ԵՎ ՈՒՂԻ» ճարտարապետական համալսարանների միջազգային կոնսորցիումի անդամ բուհերի նախագահական համաժողովը, դրա շրջանակում կայացած ճարտարապետական ուսանողական մրցույթի արդյունքների ամփոփումը:
ՃՇՀԱՀ և Պեկինի շինարարության և ճարտարապետության համալսարանի միջև ձևավորված սերտ համագործակցության շնորհիվ՝ մեր համալսարանը 2017 թ. սկսած ակտիվ մասնակցություն է ցուցաբերում «ԳՈՏԻ ԵՎ ՈՒՂԻ» նախաձեռնությանը, որի կազմակերպումն ու ֆինանսավորումը իրականացվում է Չինաստանի Ժողովրդական Հանրապետության կառավարության կողմից:
«ԳՈՏԻ ԵՎ ՈՒՂԻ» ճարտարապետական համալսարանների միջազգային կոնսորցիումի անդամ բուհերի նախագահական համաժողովը ղեկավարում էր Պեկինի շինարարության և ճարտարապետության համալսարանի նախագահ՝ պրոֆեսոր Ժանգ Այլինը: Միջոցառմանը հրավիրված էին մասնակցելու Պեկինի քաղաքային իշխանությունների անդամներ, Չինաստանի, Ֆրանսիայի, Ռուսաստանի, Մեծ Բրիտանիայի, Լեհաստանի, Բոսնիա և Հերցեգովինայի առաջատար բուհերի ղեկավարներ, ոլորտային կազմակերպությունների ներկայացուցիչներ:
Համաժողովին մասնակցեցին Ճարտարապետության և շինարարության Հայաստանի ազգային համալսարանի ռեկտորի ժ/պ, պրոֆեսոր Եղիազար Վարդանյանը, համալսարանի գիտական աշխատանքների գծով պրոռեկտոր՝ Մանուկ Բարսեղյանը, Ճարտարապետության ֆակուլտետի դեկան՝ Գառնիկ Ստեփանյանը և Լեզուների կենտրոնի ղեկավար՝ Սիրանուշ Հովհաննիսյանը:
Իր ելույթի խոսքում պարոն Վարդանյանը ողջունեց բոլոր ներկաներին և շնորհակալություն հայտնելով միջոցառման կազմակերպիչներին հրավերի համար՝ ՃՇՀԱՀ ողջ անձնակազմի և ուսանողության անունից երախտագիտության խոսքեր փոխանցեց Պեկինի շինարարության և ճարտարապետության համալսարանի ողջ անձնակազմին և նախագահ, պրոֆեսոր Ժանգ Այլինին՝ մեր համալսարանին և ողջ հայ ժողովրդին հայ-ադրբեջանական հակամարտության կապակցությամբ զորակցություն հայտնելու համար:
Պարոն Վարդանյանը մեծապես կարևորեց շարունակական և փոխշահավետ համագործակցությունը «ԳՈՏԻ ԵՎ ՈՒՂԻ» ճարտարապետական համալսարանների միջազգային կոնսորցիումի անդամ բուհերի միջև՝ առանձնակի ուշադրություն դարձնելով «ԳՈՏԻ ԵՎ ՈՒՂԻ» նախաձեռնության շրջանակում ճարտարապետական համայնքի ձևավորմանը:
Համագործակցությունն առավել առարկայական և արդյունավետ դարձնելու նպատակով՝ ռեկտորի ժ/պ Վարդանյանի կողմից առաջարկվեց խրախուսել միջազգային մրցույթ-ստուգատեսների համատեղ կազմակերպումն ու անցկացումը, պրոֆեսորադասախոսական անձնակազմի և ուսանողների միջազգային գիտակրթական ծրագրերի շրջանակում փոխանակումները: Հաշվի առնելով սեյսմակայուն շինարարության ոլորտում Չինաստանի հարուստ փորձը՝ առաջարկվեց կազմակերպել հայ մասնագետների մասնակցությամբ համատեղ գիտափորձարարական հետազոտություններ: Կարևորվեց ուսանողների և պրոֆեսորադասախոսական կազմի համար գործընկեր բուհերում առկա էլեկտրոնային գրադարաններին հասանելիություն ապահովող մեխանիզմների ներդրումը: Անդրադարձ կատարվեց ժամանակակից շինարարական նյութերի ստացման, հետազոտման և կիրառման ոլորտում համագործակցության հաստատմանն ու «կանաչ քաղաքների» նախագծմանը:
Այնունհետև կայացավ «ԳՈՏԻ ԵՎ ՈՒՂԻ» ճարտարապետական համալսարանների միջազգային կոնսորցիումի անդամ բուհերի նախագահական համաժողովի շրջանակում անցկացված ճարտարապետական ուսանողական մրցույթի արդյունքների ամփոփումը: «Ճարտարապետական նախագծում» անվանակարգում ՃՇՀԱՀ ճարտարապետության ֆակուլտետի ունանողներ Վահրամ Աղաջանյանի և Լեռնիկ Գալստյանի՝ «Սուրբ Ղազար կղզու Մխիթարյան Մայրավանքի գրադարանի ռեվալորիզացիայի հայեցակարգ» նախագիծն արժանացավ պատվոգրի (ղեկավարներ` պրոֆեսոր Արտյոմ Ալոյան, դոցենտ Հովհաննես Սանամյան): Նույն մրցույթի «Կոնստրուկտիվ նախագծում» անվանակարգում ՃՇՀԱՀ նույն ֆակուլտետի ուսանող Մարիետտա Գևորգյանի՝ «Ջերմուկ քաղաքի հյուրանոցի, կամուրջի և բազմաֆունկցիոնալ համալիրի կառուցում» նախագիծը արժանացավ մրցանակային երրորդ տեղի և դրամական պարգևի (ղեկավար` պրոֆեսոր Հայկ Ասատրյան):
