(010) 303-300
ՃԱՐՏԱՐԱՊԵՏՈՒԹՅԱՆ ԵՎ ՇԻՆԱՐԱՐՈՒԹՅԱՆ ՀԱՅԱՍՏԱՆԻ ԱԶԳԱՅԻՆ ՀԱՄԱԼՍԱՐԱՆ
100-ամյա պատմություն ունեցող համալսարան
Երեկ ՄԱԿ—ի նիստերի դահլիճում կայացել է Քաղաքաշինության կոմիտեի և ՄԱԶԾ-ի համատեղ կազմակերպած աշխատաժողով—քննարկումը: Նպատակը՝ բազմաբնակարան և հասարակական շենքերի անձնագրերի օրինակելի ձևերի նախագծերի, ինչպես նաև բազմաբնակարան շենքերի պահպանման և շահագործման կանոնների նախագծերի մշակման աշխատանքների արդյունքները քննարկելն ու հստակեցնելն էր:
Աշխատաժողովին ներկա էին նաև Ճարտարապետության և շինարարության Հայաստանի ազգային համալսարանի ռեկտոր Գագիկ Գալստյանը, Ֆինանսատնտեսական և տեղեկատվական աշխատանքների գծով պրոռեկտոր Մարինա Ղազարյանը և Շինարարության ֆակուլտետի դեկան Դավիթ Գրիգորյանը:
Քաղաքաշինության կոմիտեի նախագահի պարտականությունները կատարող Արմեն Ղուլարյանը՝ներկայացնելով հասարակական և բազմաբնակարան շենքերի պահպանման, արդիականացման, ինչպես նաև բազմաբնակարան շենքերի հուսալիության բարելավմանն առնչվող հարցերը, նշել է, որ երկար տարիներ շենքերի և շինությունների տեխնիկական վիճակի և խոցելիության համակարգված հետազննություններ չեն իրականացվել և գործընթացը կրել է իրավիճակային բնույթ:
Քաղաքաշինության կոմիտեն դեռևս 2018 թ-ի փետրվարին դիմել էր ՄԱԿ—ի Զարգացման ծրագրին՝ որոշ աշխատանքների իրականացմանն աջակցելու հնարավորության հարցը քննարկելու խնդրանքով: Արդյունքում՝ ՄԱԶԾ հայաստանյան գրասենյակը պատրաստակամություն էր հայտնել «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԶԾ—Կանաչ Կլիմայի Հիմնադրամի ծրագրի շրջանակներում առաջնահերթ փուլով անդրադառնալ հասարակական և բազմաբնակարան շենքերի անձնագրերի օրինակելի ձևերի մշակման և շենքերի տեղեկատվական համակարգի ներդրման համակարգչային ծրագրի տեխնիկական առաջադրանք կազմելուն:
2018 թ-ի նոյեմբերից ՄԱԶԳ—ի կողմից մրցութային կարգով ներգրավված կապալառուներն իրականացրել են այդ աշխատանքները: Անձնագրերի օրինակելի ձևերի նախագծերը մշակվել են «Ուրբան» հիմնադրամի և «Հայնախագիծ» բաց բաժնետիրական ընկերության կոնսորցիումի, իսկ կանոնների նախագիծը՝ Ճարտարապետության և շինարարության Հայաստանի ազգային համալսարանի կողմից:
