ՃԱՐՏԱՐԱՊԵՏՈՒԹՅԱՆ ԵՎ ՇԻՆԱՐԱՐՈՒԹՅԱՆ ՀԱՅԱՍՏԱՆԻ ԱԶԳԱՅԻՆ ՀԱՄԱԼՍԱՐԱՆ

100-ամյա պատմություն ունեցող համալսարան

ՔԱՂԱՔԱՇԻՆՈՒԹՅԱՆ ԿՈՄԻՏԵԻ ՆԱԽԱԳԱՀ, ՃՇՀԱՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԱԽԱԳԱՀ ԱՐՄԵՆ ՂՈՒԼԱՐՅԱՆԻ ՇՆՈՐՀԱՎՈՐԱԿԱՆ ՈՒՂԵՐՁԸ ՇՐՋԱՆԱՎԱՐՏՆԵՐԻՆ

Ճարտարապետների, շինարարների, կառուցապատողների մեծ բանակի անունից ողջունում եմ բոլորիդ այս տոնի վերածված կարևոր օրվա առթիվ: Ճարտարապետական, շինարարական և պատմամշակութային գլուխգործոց Գառնիի տաճարում մասնագիտական կյանքի կարևորագույն վկայագիրը ստանալը մեծ խորհուրդ ունի:

Սիրելի´ շրջանավարտներ, այս օրը ձեր կյանքում շրջադարձային է: Դուք մուտք եք գործում մասնագիտական գործնական միջավայր՝ ունենալով ավելի քան 100-ամյա պատմությամբ բուհում ստացած գիտելիքները և մասնագիտական որակավորումը հավաստող փաստաթուղթը: Մաղթում եմ, որ ձեր առաջին քայլերը կատարեք վստահությամբ, ձեր գաղափարները կյանքի կոչելու մեծ խանդավառությամբ և մասնագիտական կոչմանը ծառայելու պատրաստակամությամբ:

Որպես մասնագետ կայանալու ճանապարհին դուք տարբեր իրավիճակներում եք հայտնվելու: Իմացե´ք, որ ձեր ուղեկիցը համալսարանն է՝ պրոֆեսորադասախոսական անձնակազմով, հոգաբարձուների խորհրդով, ձեր թիկունքին Հայաստանի Հանրապետությունն է, և մենք բոլորս:

Ձեզնից ակնկալվում է երազանքին ձգտելու համառություն, աշխատասիրություն, շարունակ սովորելու և հմտությունները կատարելագործելու, կայացած մասնագետներից նոր գիտելիքներ քաղելու պատրաստակամություն:

Որպես Քաղաքաշինության կոմիտեի նախագահ՝ ինձ համար ևս այս օրը հատկանշական է: Մեծ սպասելիքներ ունեմ, որ մասնագիտական ասպարեզում կհայտնվեն թարմ գաղափարներ, ներուժ ունեցող երիտասարդներ, ովքեր կա´մ կհամալրեն կոմիտեի շարքերը, կա´մ իրենց կդրսևորեն մասնավոր ոլորտում և բոլոր դեպքերում էլ կնպաստեն մեր երկրում քաղաքաշինության զարգացմանը:

Համալսարանի հետ Քաղաքաշինության կոմիտեի կապն անմիջական է: Դեռ ուսումնառության ընթացքում ուսանողները կոմիտեի տարբեր ծրագրերի շրջանակում ոլորտի արհեստավարժների, անգամ արտերկրի փորձագետների հետ համագործակցելու հնարավորություն են ստանում: Քաղաքաշինության կոմիտեի աշխատակիցներից շատերը նաև դասավանդում են բուհում: Իսկ ստորագրված հուշագրի շնորհիվ ապահովվում է բուհ-աշխատաշուկա-պետություն կապը:

Կառավարության նախաձեռնությամբ հանրապետությունում այսօր շինարարական մեծածավալ ծրագրեր են իրականացվում: Այս առումով առավել քան կարևոր է որակյալ մասնագետների դերը: Ուստի, իմ խորին շնորհակալությունը պետք է հայտնեմ բուհի պրոֆեսորադասախոսական անձնակազմին՝ ճարտարապետների և շինարարների սերունդներ կրթելու տքնաջան, անձնվեր, բայց պատվաբեր աշխատանքի համար: 

Կրկին շնորհավորում եմ և երիտասարդ մասնագետներին մաղթում կանաչ ճանապարհ:

 205 просмотров всего,  1 просмотров сегодня

28.08.22

 206 просмотров всего,  2 просмотров сегодня