(010) 303-300
Սիրելի՛ գիտնականներ, հետազոտողներ, դասախոսներ և երիտասարդ գիտնականներ,
Սրտանց շնորհավորում եմ ձեզ Գիտության համաշխարհային օրվա առթիվ։ Գիտությունը հասարակության առաջընթացի, նորարարության և կայուն զարգացման կարևորագույն շարժիչ ուժերից է։ Այն ոչ միայն ընդլայնում է մարդկային գիտելիքի սահմանները, այլև ստեղծում է նոր հնարավորություններ՝ ժամանակակից մարտահրավերներին դիմակայելու և ավելի անվտանգ ու բարեկեցիկ ապագա կառուցելու համար։
Այսօր, երբ աշխարհն արագորեն փոխվում է, առավել քան երբևէ կարևորվում են գիտական մտքի ազատությունը, հետազոտությունների որակը, միջգիտակարգային համագործակցությունը և գիտական արդյունքների գործնական կիրառությունը։
Վստահ եմ, որ Հայաստանի զարգացման և միջազգային մրցունակության բարձրացման գործում գիտությունը պետք է ունենա առանցքային դերակատարություն։ Մեր կարևորագույն առաքելություններից է ստեղծել այնպիսի միջավայր, որտեղ գիտական միտքը, ստեղծագործական նախաձեռնությունն ու նորարարությունը կստանան լիարժեք զարգանալու հնարավորություն, իսկ երիտասարդ սերունդը գիտությամբ զբաղվելը կդիտարկի որպես հեռանկարային և պատվաբեր առաքելություն։
Մաղթում եմ բոլոր գիտնականներին ստեղծագործական նոր ձեռքբերումներ, համարձակ գաղափարներ, արդյունավետ համագործակցություն և գիտական նշանակալի հաջողություններ։
Թող գիտելիքը, գիտական միտքն ու նորարարությունը շարունակեն ծառայել Հայաստանի առաջընթացին, խաղաղության ամրապնդմանն ու մարդկության բարօրությանը։
