(010) 303-300
Այսօր ՀՀ Ճարտարապետների միությունում տեղի ունեցավ միության 19-րդ համագումարը: Համագումարին ներկա էին միության ղեկավար Մկրտիչ Մինասյանը, Քաղաքաշինության պետական կոմիտեի նախագահ Նարեկ Սարգսյանը, փոխքաղաքապետ Կամո Արեյանը, Հայաստանի Շինարարների միության նախագահ, Ճարտարապետության և շինարարության Հայաստանի ազգային համալսարանի ռեկտոր Գագիկ Գալստյանը, Հայաստանի Շինարարների միության տնօրեն Գուրգեն Մինասյանը, միության անդամներ, ոլորտի ներկայացուցիչներ։ Միության 244 անդամներից համագումարին ներկա էին 196-ը։
Ողջունելով ներկաներին՝ պետական կոմիտեի նախագահ Նարեկ Սարգսյանը միության 19-րդ համագումարը պատմական որակեց այն առումով, որ միությունը վերակազմավորվում է՝ որպես «Ճարտարապետների պալատ»:
Համագումարի օրակարգում Հայաստանի ճարտարապետների օրենսդրական կարգավիճակի հարցերն էին «Հայաստանի ճարտարապետների պալատ» ինքնակարգավորվող կազմակերպության անհրաժեշտ կանոնադրության և վերակազմավորման համար փաստաթղթերի հաստատումն ու Ճարտարապետների պալատի նախագահի ընտրությունը:
Նա նշեց, որ գրեթե բոլոր երկրներում պետության կողմից սահմանված ճարտարապետների կարգավիճակը շատ հստակ է և ուժեղ՝ հավելելով, որ դեռևս 1992թ-ին էր դրվել այն հարցը, որ ճարտարապետներին միավորող կառույցը չի կարող լինել զուտ հասարակական միավորում. «Այսօր, բարեբախտաբար, կարողացանք հասնել նրան, որ ընդունվեց «Ճարտարապետական գործունեության մասին» օրենքը: Եվ հետխորհրդային երկրներում ճարտարապետներին միավորող կառույցին տրված այս կարգավիճակով Հայաստանն առաջինն է»: Նարեկ Սարգսյանը հայտարարեց, որ ըստ ՀՀ Ազգային ժողովի՝ 2017թ-ի դեկտեմբերի 6-ին՝ 92 կողմ ձայնով միաձայն ընդունված՝ «Ճարտարապետական գործունեության մասին» ՀՀ օրենքի, Հայաստանում ճարտարապետների միության բազայի հիման վրա պիտի ձևավորվեր ոլորտի գործունեությունը կարգավորող նոր մարմին` Ճարտարապետների պալատը: Այսօր՝ միության 19 րդ համագումարում Ճարտարապետների պալատի վերակազմավորումը հաստատվեց. «Պալատի կարգավիճակը պետության կողմից հաստատված է: Այն լուրջ բազա է, որ ճարտարապետների ապագա սերունդն այլ պայմաններում աշխատի»,- հավելեց Նարեկ Սարգսյանը:
Համագումարին ներկա փոխքաղաքապետ Կամո Արեյանը վստահեցրեց, որ քաղաքապետարանը կշարունակի իր համագործակցությունը ապագա ճարտարապետների պալատի հետ. «Մենք պետք է ողջամտորեն ընդունենք նոր կյանքի մարտահրավերները, և միասնաբար ամուր պահենք մեր ունեցած դասական ճարտարապետությունը»։
Համագումարի մասնակիցներին իր ողջույնի խոսքը հղեց նաև ՃՇՀԱՀ-ի ռեկտոր, ՀՀ Շինարարների միության նախագահ Գագիկ Գալստյանը: Շնորհավորելով ճարտարապետական գործունեության օրենքի ընդունման կապակցությամբ՝ ռեկտոր Գալստյանը հույս հայտնեց, որ նորակազմ Ճարտարապետների պալատն իր գործունեությամբ էլ ավելի կնպաստի հայկական ճարտարապետության զարգացմանը և դիմագծի պահպանմանը: «Առանձնակի նշելով ճարտարապետների միության և մեր բարեկամական ու գործնական հարաբերությունները՝ մասնագիտական կադրերի պատրաստման, քաղաքաշինական խնդիրների լուծման գործերում, հավաստիացանում եմ, որ մեր համագործակցությունն այսուհետ կլինի ավելի սերտ և արդյունավետ»,- հավելեց Գ. Գալստյանը:
Նշենք, որ այսօր հրավիրված համագումարի ընթացքում նախատեսված է ընտրել նախկին Ճարտարապետների միության փոխարեն նոր կազմավորված «Ճարտարապետների պալատ» ինքնակառավարվող միավորման նոր նախագահին։
