(010) 303-300
Սիրելի՛ համալսարանականներ, սեպտեմբերի 1-ը նոր սկզբի, նոր նպատակների և նոր հնարավորությունների խորհուրդն ունի։ Այն օրը, երբ կրթական միջավայրը կրկին լցվում է եռուզեռով, նոր գաղափարներով և ապագայի հանդեպ հավատով։
Ջերմորեն շնորհավորում եմ Ճարտարապետության և շինարարության Հայաստանի ազգային համալսարանի, ինչպես նաև մեր Ավագ դպրոցի և Միջին մասնագիտական քոլեջի ուսանողներին, աշակերտներին, դասախոսներին և աշխատակիցներին՝ նոր ուսումնական տարվա մեկնարկի կապակցությամբ։
Հատուկ բարեմաղթանքներ եմ հղում մեր առաջինկուրսեցիներին։ Դուք այսօր սկսում եք մի նոր ճանապարհ, որը միայն մասնագիտություն ձեռք բերելու մասին չէ։ Համալսարանական տարիները հնարավորություն են՝ բացահայտելու սեփական ներուժը, ձևավորելու ինքնուրույն մտածողություն, ստեղծելու, փորձարկելու և սեփական գաղափարներով փոխելու շրջապատող աշխարհը։
ՃՇՀԱՀ-ը կրթության հետ մեկտեղ ստեղծագործության, գիտության, նորարարության և մասնագիտական համագործակցության միջավայր է։ Մեր առաքելությունն է ձևավորել այնպիսի մասնագետներ, որոնք ոչ միայն տիրապետում են իրենց մասնագիտությանը, այլև ունակ են պատասխանատվությամբ արձագանքելու ժամանակի պահանջներին և իրենց գիտելիքը ծառայեցնելու երկրի զարգացմանը։
Սիրելի՛ ուսանողներ, հավատացեք ձեր ուժերին, մի վախեցեք նոր գաղափարներից, հարցերից ու փորձություններից։ Յուրաքանչյուր հաջողություն սկսվում է սովորելու և առաջ շարժվելու ցանկությունից։
Սիրելի՛ դասախոսներ և համալսարանի աշխատակիցներ, ձեր գիտելիքը, փորձը և նվիրումն այն կարևոր հիմքն են, որի վրա կառուցվում է մեր համալսարանի վաղվա օրը։ Շնորհակալ եմ ձեր ամենօրյա աշխատանքի, մասնագիտական բարձր պատասխանատվության և երիտասարդ սերնդի կրթության գործում ունեցած անգնահատելի ներդրման համար։
Թող նոր ուսումնական տարին մեզ համար լինի նոր գաղափարների, մասնագիտական աճի, գիտական ձեռքբերումների և հաջողված նախաձեռնությունների տարի։ Թող յուրաքանչյուր ուսանող այստեղ գտնի իր ճանապարհը, յուրաքանչյուր դասախոս՝ իր աշխատանքի նոր իմաստը, իսկ համալսարանը՝ զարգացման նոր հնարավորություններ։
Բարի գալուստ նոր ուսումնական տարի և բարի երթ՝ գիտելիքի ու ստեղծարարության ճանապարհին։
