(010) 303-300
Մինսկում ավարտվեց «Ռուսաց լեզվի և մշակույթի պահպանումը, աջակցությունը և առաջխաղացումը արտերկրում» խորագրով 15-րդ միջազգային համաժողովը, որը մեկ հարթակում էր համախմբել ռուսաց լեզվի շուրջ մասնագիտական համայնքի ներկայացուցիչներին աշխարհի տարբեր երկրներից։ Համաժողովը կազմակերպվել էր Մոսկվայի կառավարության և Մինսկում գտնվող Մոսկվայի տան կողմից՝ նպաստելով միջազգային կրթական և մշակութային համագործակցության ամրապնդմանը։
Միջազգային համաժողովը ներկայացրեց Ազգային հետազոտական համալսարանի տնտեսագիտության բարձրագույն դպրոցի լրատվամիջոցների ինստիտուտի պրոֆեսոր, Պուշկինի անվան մրցույթի ժյուրիի նախագահ, փիլիսոփայության դոկտոր Մարինա Կորոլյովան։ Առանձնահատուկ հետաքրքրություն են առաջացրել նաև Պուշկինի ինստիտուտի համաշխարհային գրականության ամբիոնի դոցենտ Սերգեյ Վալյուգինի դասախոսությունները և նրա կողմից անցկացված գրական վիկտորինան։
Համաժողովին մասնակցել են 22 երկրների շուրջ 60 ռուսաց լեզվի ուսուցիչներ և ռուսաց լեզվի կենտրոնների ղեկավարներ։ Ծրագրի շրջանակում անցկացվել են բովանդակալից դասախոսություններ և գործնական քննարկումներ՝ նվիրված ժամանակակից լեզվաբանությանը, կրթական նորարարություններին և ուսուցչի մասնագիտական զարգացմանն առնչվող թեմաներին։ Մասնավորապես, անդրադարձ է կատարվել պոլիկոդային տեքստերի ընթերցման մեթոդներին, ուսանողների մոտիվացիայի ժամանակակից մոտեցումներին, լեզվի և ուղեղի փոխազդեցությանը, սթրեսի կառավարման արդյունավետ գործիքներին, ուսուցչի լեզվական անհատականությանը, խաղային տեխնոլոգիաների կիրառմանը ռուսաց լեզվի դասավանդման մեջ, ինչպես նաև թվային ուսուցման հնարավորություններին։
Մշակութային ծրագրի շրջանակում մասնակիցներն այցելել են Բելառուսի Մեծ թատրոն և Հայրենական մեծ պատերազմի պատմության պետական թանգարան։ Համաժողովի ընթացքում ցուցադրվել է նաև «Գրիբոյեդովի Մոսկվան» ցուցահանդեսը։
Ծրագրի ավարտին բոլոր մասնակիցներն ստացան վկայականներ, իսկ ելույթ ունեցողները՝ շնորհակալագրեր։
