(010) 303-300
Գիտակրթական ոլորտում Հայաստանի և Ռուսատանի միջև ձևավորված դարավոր համագործակցությունը մեր օրերում նոր որակ և պահանջներ է թելադրում՝ ընդլայնելով բուհական աշխարհագրությունը։ Պետերբուրգի Ալեքսանդր I կայսեր անվան հաղորդակցության ուղիների 200-ամյա պետական և Ճարտարապետության և շինարարության Հայաստանի ազգային 100-ամյա համալսարանների ռեկտորները վավերացրին «Գիտության և կրթության ոլորտներում համագործակցության մասին» համաձայնագիր։
«Ոչ միայն առաջին երկաթուղին, այլև Սանկտ Պետերբուրգի գրեթե բոլոր կամուրջները կառուցել են մեր համալսարանի դասախոսներն ու շրջանավարտները: Մենք ձգտում ենք էլ ավելի զարգացնել ավանդաբար ձևավորված ոլորտային ուղղությունը և հույս ունենք, որ այս համագործակցությունը կնպաստի այդ գործընթացին, ինչպես նաև խթան կհանդիսանա մեր երկու երկրների դարավոր բարեկամության ամրապնդմանը»,− շնորհակալություն հայտնելով ՃՇՀԱՀ-ին հայկական ջերմ հյուրընկալության համար՝ ասաց Պետերբուրգի Ալեքսանդր I կայսեր անվան հաղորդակցության ուղիների պետական համալսարանի ռեկտոր Ա. Յու. Պանիչևը։
Նշված համաձայնագրով նախատեսվում է իրականացնել համատեղ կրթական ծրագրերի մշակում, փոխադարձ հետաքրքրություն ներկայացնող ոլորտներում հետազոտությունների անցկացում՝ ֆինանսական կարողություններին համապատասխան, հետազոտությունների արդյունքների հրապարակում, երկու կողմերի երկրների պահանջներին համապատասխան պրոֆեսորադասախոսական կազմի, փորձագետների և ուսանողների փոխանակումներ, ինչպես նաև գիտական նվաճումների, գիտաժողովների, սիմպոզիումների և այլ հիշարժան իրադարձությունների անցկացման մասին տեղեկատվության փոխանակում և այլն։ Երկու համալսարանների միջև համագործակցությունը իրականություն դարձավ Պետերբուրգի Ալեքսանդր I կայսեր անվան հաղորդակցության ուղիների պետական համալսարանի նախաձեռնությամբ։
ՃՇՀԱՀ ռեկտոր Եղիազար Վարդանյանը, ընդգծելով գործընկեր համալսարանի զգալի ու առանցքային դերը միջազգային հարթակում, գիտակրթական ոլորտում, շնորհակալություն հայտնեց համալսարանի նկատմամբ ցուցաբերված հետաքրքրության համար և ասաց․ «Լիահույս ենք, որ այս համագործակցությունը յուրովի խթան է դառնալու՝ հետաքրքիր փոխշահավետ ծրագրերի իրականացման և հնարավորությունների նոր ուղիների ստեղծման։ Այս համաձայնագիրը վկայում է մեր երկրների և բուհերի միջև բարձր փոխգործակցության բարձր մակարդակի մասին։ Պատրաստակամ ենք ընդունելի ձևաչափով ընդլայնելու մեր երկողմյա համագործակցությունը»։
Հանդիպման ընթացքում կողմերը ներկայացրին համալսարանների գործունեության մասին տեղեկություններ, հանդես եկան ակադեմիական, գիտական և մշակութային ոլորտներում կապերի զարգացման առաջարկներով: Ծավալված հետաքրքիր քննարկումների արդյունքում Պետերբուրգի Ալեքսանդր I կայսեր անվան պետական համալսարանի ռեկտորը հնարավոր համարեց ՃՇՀԱՀ-ի հետ համատեղ մասնակցությունը կոմերցիոն ծրագրերում և առաջարկեց ՃՇՀԱՀ-ին ընդգրկվել իրենց գիտական ամսագրերից մեկի խմբագրակազմում։
Իր հերթին ՃՇՀԱՀ ռեկտորը գործընկերներին հրավիրեց համալսարանի 100-ամյակի շրջանակներում նախատեսվող միջազգային գիտաժողովին: Սանկտ Պետերբուրգի Ալեքսանդր I կայսեր անվան հաղորդակցության ուղիների պետական համալսարանի ռեկտորը փոխադարձ հրավեր արեց՝ մասնակցելու դեկտեմբերին նախատեսված Բետանկուրյան երրորդ ինժեներական միջազգային համաժողովին:
