(010) 303-300
Ասում են՝ մարդկանց լավ ճանաչելու լավագույն տարբերակը միասին ճանապարհ գնալն է: Ճարտարապետության և շինարարության Հայաստանի ազգային համալսարանում սա լավ գիտեն, և յուրաքանչյուր տարի ամռանը, ուսանողները դառնում են ճամբարականների մի մեծ ու համերաշխ խումբ և ճանապարհ ընկնում՝ դեպի տպավորիչ, բացահայտումներով ու հաղթանակներով լեցուն ճամբար:
Այս տարի «Երիտասարդ ինժեներների հավաք-2020»-ը Ստեփանավանում էր՝ օգոստոսի 27-31-ը: Եվ ի՞նչ ճամբար՝ առանց խարույկի: Պահպանելով հակահամաճարակային կանոնները մեր ուսանողները ծանոթացան, կիսվեցին միմյանց հետաքրքրություններով, քննարկեցին առաջիկա օրերի անելիքները:
«Երվանդունիներ», «Հայկազունիներ», «Արշակունիներ», «Արտաշեսյաններ», «Մամիկոնյաններ», «Բագրատունիներ» անունները կրող ջոկատներն հայոց արքաների վստահությամբ և հաղթելու հստակ որոշմամբ մրցեցին ճատրակի և վոլեյբոլի առաջնություններում, իրենց ուժերը փորձեցին հրաձգության և տարբեր ազգային խաղերում: Լավագույններն ուրվագծվում էին, միավորներն՝ ավելանում, սակայն հաղթողի տիտղոսին արժանանալու համար դեռ նոր փորձություններ էին սպասվում:
Առջևում «Արքայատոհմեր» թեմատիկայով նկարչության մրցույթն էր և ինտելեկտուալ խաղերը, որոնցում, ջոկատներից յուրաքանչյուրը, փայլուն արդունքներ գրանցելով, մոտենում էր եզրագծին: Բայց, ավարտի մասին՝ վերջում:
Ինչպես կիսվում են ճամբարականները, օրերը հագեցած էին ոչ միայն խաղերով ու մրցակցությամբ, այլ նաև՝ ճանաչողական զրույցներով: Երևանի Մխիթար Հերացու անվան պետական բժշկական համալսարանի Ուսանողական խորհրդի կողմից հյուրընկալված ապագա բժիշկների կողմից ուսանողների համար կազմակերպվել էր դասախոսություն՝ «Առաջին բուժօգնություն» թեմայով:
Ահա և վերջ. միավորներն ամփոփելու և հաղթողներին որոշելու օրն էր: Արդյունքում՝ գլխավոր տիտղոսակիր ճանաչվեց «Արտաշեսյաններ» ջոկատը, 2-րդը՝ «Մամիկոնյաններ»-ը և 3-րդը՝ «Բարգրատունիներ»-ը: Բայց վերադառնալ քաղաք առանց որևէ նոր և անմոռանալի տպավորության, անհնարին էր: Ուսանողները ճամբարային օրերն ամփոփեցին արշավով և սարի գլխին՝ Լոռվա կազդուրիչ ու սառն օդով համեմված նախաճաշով:
