ՃԱՐՏԱՐԱՊԵՏՈՒԹՅԱՆ ԵՎ ՇԻՆԱՐԱՐՈՒԹՅԱՆ ՀԱՅԱՍՏԱՆԻ ԱԶԳԱՅԻՆ ՀԱՄԱԼՍԱՐԱՆ

Օրերս ՃՇՀԱՀ էր այցելել Ամերիկահայ գիտնականների և Ճարտարագետների ընկերակցության հյուսիս-արևելյան պատվիրակությունը:

Հանդիպմանը ներկա էին ՃՇՀԱՀ ռեկտորի ժ/պ Մանուկ Բարսեղյանը, համալսարանի պրոռեկտորները, Աշխատակազմի ղեկավարը, Կրթական որակի ապահովման և զարգացման կենտրոնի ղեկավարը, Կառավարման և տեխնոլոգիայի, Քաղաքային տնտեսության և էկոլոգիայի ֆակուլտետների դեկանները, Միջազային համագործակցության վարչության խորհրդականը, ոլորտային մասնագետներ:

Հանդիպման ընթացքում ներկայացվեց ՃՇՀԱՀ Կրթական որակի ապահովման և զարգացման կենտրոնի ղեկավար Վարազդատ Հովհաննիսյանի, Միջազային համագործակցության վարչության խորհրդական Արմեն Մինասյանի ԱՄՆ կատարած գործուղման արդյունքների մասին հաշվետվությունը, ինչպես նաև հանդիպումների ընթացքում ձեռք բերված պայմանավորվածությունները:

Քննարկվեցին համալսարանի, Ամերիկայի հայ գիտնականների և Ճարտարագետների ընկերակցության, Ռատգերս և Լիհայ համալսարանների միջև համագործակցությանն ուղղված հարցեր: Կողմերը կարևորեցին հատկապես հետևյալ կետերը`   

• ՃՇՀԱՀ-ում տարածաշրջանային կրթական կենտրոնի ստեղծումը՝ ենթակառուցվածքների, տրանսպորտի և ինժեներական նախագծերի կառավարման (նախագծման և շինարարության) կրթության զարգացման նպատակով, դրանով իսկ դարձնելով Հայաստանը տարածաշրջանային հաբ:
• Համալսարանում կենտրոնի ստեղծումը մեծապես կնպաստի առկա կրթական ծրագրերի արդիականացմանը, համալսարանի պրոֆեսորադասախոսական կազմի վերապատրաստամանը, իսկ երկարաժամկետ հեռանկարում` Հայաստանի ենթակառուցվածքների, տրանսպորտի ոլորտի առկա առկա խնդիրների լուծմանը:
• Հայաստանում առկա ենթակառուցվածքների և տրանսպորտային միջոցների արդիականացումը, ոլորտային մասնագետների պատրաստումը, վերապատրաստումը:
• Հայաստանի ենթակառուցվածքների և տրանսպորտային միջոցների նախագծման, կառավարման, պահպանման և մոնիթորինգի համակարգերի բարելավման հնարավորությունները:
• Շինարարության ոլորտում նյութագիտության զարգացման հետ կապված հարցերը:

Բոլոր ծրագրերը կիրականացվեն ՀՀ Կրթության, գիտության, մշակույթի, սպորտի նախարարության, ՀՀ Տարածքային կառավարման և ենթակառուցվածքների նախարարության, ՀՀ Քաղաքաշինության կոմիտեի, Երևանի քաղաքապետարանի, տեղական ինքնակառավարման մարմինների հետ սերտ համագործակցությամբ: