Ճարտարապետության ԵՎ Շինարարության
Հայաստանի ազգային համալսարան

Եվրոպական հավատարմագրում ունեցող համալսարան

Ճարտարապետության ԵՎ Շինարարության
Հայաստանի ազգային համալսարան

Եվրոպական հավատարմագրում ունեցող համալսարան

ԳԱԳԻԿ ԳԱԼՍՏՅԱՆԸ՝ ՎԱՍՏԱԿԱՎՈՐ ՇԻՆԱՐԱՐ.  ՆՇՎԵՑ ՀԱՅ ՇԻՆԱՐԱՐԻ ՄԱՍՆԱԳԻՏԱԿԱՆ ՏՈՆԸ

Այսօր մեծ հանդիսությամբ, ավանդաբար, նշվեց հայ Շինարարի մասնագիտական տոնը: Տոնական միջոցառմանը ներկա էին ՀՀ փոխվարչապետ Տիգրան Ավինյանը, Քաղաքաշինության կոմիտեի նախագահ Վահագն Վերմիշյանը, ՀՀ Շինարարների միության նախագահ, ՃՇՀԱՀ ռեկտոր Գագիկ Գալստյանը, ոլորտի ներկայացուցիչներ և հյուրեր:

Շնորհավորելով խորհրդանշական տոնի առթիվ՝ փոխվարչապետ Ավինյանը նշեց, որ հայ շինարարը մշտապես եղել է հասարակության ստեղծարար ուժերի առաջատար դիրքերում, իսկ շինարարները մարդիկ են, որոնք մեր երկրի տնտեսության շարժիչ ուժերից մեկի՝ շինարարության ոլորտի անձնուրաց նվիրյալներն են: Այս համատեքստում՝ փոխվարչապետը կարևորեց, հատկապես, սոցիալական ուղղվածություն ունեցող կառուցապատման ծրագրերի իրագործումը. «Կառավարությունը գիտակցում է, որ շինարարական ոլորտն առողջացնելու համար շատ կարևոր է լիցենզավորման ու գնագոյացման խնդիրների կարգավորումը, ինչպես նաև փոխկապակցված պետական շինարարության մրցույթների գործընթացի հիմնովին վերանայման հարցը: Նաև անհրաժեշտ է փորձագիտական ոլորտի բարելավում, որը կապահովի վաղվա կառույցների անվտանգությունը»:

«ՀՀ կառավարության կողմից առանձնակի հանդիսությամբ նշվող այս մասնագիտական տոնն ամրագրում է քաղաքաշինության բնագավառի և, հատկապես շինարարի կարևոր առաքելությունը երկրի տնտեսության զարգացման և առաջընթացի գործում»,-Հայաստանի շինարարների միության և անձամբ իր անունից շնորհավորական ուղերձում նկատեց Գագիկ Գալստյանը: Նա նշեց, որ, ՀՀ Շինարարների միությունը, օգտագործելով իր կապերը և գործարար հարաբերությունները, պետական գերատեսչական մարմնի աջակցությամբ նախաձեռնում և անում է հնարավորինը՝ մեր երկրում շինարարական տնտեսության ներդրումային ծրագրերի իրականացման նպատակով ներգրավելու միջազգային խոշոր շինարարական կազմակերպությունների, ինչն անխուսափելի է դարձնում երկրի շինարարական տնտեսության հետագա զարգացումը: Ինչ վերաբերվում է շինարարական կրթությանը և ապագայում նույնպես հայ շինարարի պատվավոր անունը բարձր պահելուն, ապա Ճարտարապետության և շինարարության Հայաստանի ազգային համալսարանը, ՀՀ Ճարտարապետների պալատի և ՀՀ Շինարարների միության հետ համատեղ անում է առավելագույնը՝ թե’ մեր երկրում, թե’ երկրի սահմաններից դուրս, ուսանողների ճարտարապետաշինարարական որակյալ և արդյունավետ ուսումնական պրակտիկաները կազմակերպելու համար:

Փոխադարձ շնորհավորանքներին հաջորդեց ամենահատկանշականը. ՀՀ Նախագահ Արմեն Սարգսյանի հրամանագրով՝ ՀՀ Շինարարների միության նախագահ, ՃՇՀԱՀ ռեկտոր Գագիկ Գալստյանին շնորհվեց ՀՀ վաստակավոր շինարարի պատվավոր կոչում:

Շինարարը մասնագիտություն չէ, այլ՝ առաքելություն, սեփական ազգին ու ժողովրդին շարունակաբար ծառայելու, արարելու սրբագույն պարտք: Այս համոզմունքով՝ հայ շինարարները միմյանց մաղթեցին քաջ առողջություն, մասնագիտական նորանոր հաջողություններ և գալիք սերունդներին մնայուն արժեքներ փոխանցելու անսպառ հաստատակամություն:

1,813  Ընդամենը Դիտված, 5 Դիտվել է այսօր

09.08.19

1,814  Ընդամենը Դիտված, 6 Դիտվել է այսօր