(010) 303-300
Ճարտարապետության և շինարարության Հայաստանի ազգային համալսարանը հայտարարում է մրցույթ՝ ՀՀ կառավարության մամուլի կենտրոնի արդիականացման հայեցակարգի և էսքիզային նախագծի մշակման համար, համաձայն հայտարարության հավելվածը հանդիսացող նախագծման առաջադրանքի:
Մրցույթին կարող են մասնակցել համալսարանի դասախոսները՝ յուրաքանչյուր թիմում առնվազն երկու ուսանողի ներգրավումով:
Նախատեսված է մրցանակային ֆոնդ՝ լավագույն առաջարկ (առաջարկներ) ներկայացնող խմբի համար:
Մրցույթում շահած նախագիծը հիմք կհանդիսանա մամուլի կենտրոնի արդիականացման աշխատանքային նախագծի մշակման համար՝ համապատասխան վարձատրության պայմանով:
Նախագծերը պետք է ներկայացնել մրցույթի արդյունքների ամփոփման համար ձևավորված հանձնախմբին՝ մինչև ս.թ. փետրվարի 21-ը:
ՆԱԽԱԳԾՄԱՆ ԱՌԱՋԱԴՐԱՆՔ
ՀՀ կառավարության շենքի մամուլի կենտրոնի արդիականացման հայեցակարգի և էսքիզային նախագծի մշակման
ՀՀ կառավարության մամուլի կենտրոնը տեղադրված է ՀՀ կառավարության շենքի առաջին հարկի հիմնական մուտքից դեպի ձախ ընկած հատվածում:
Կենտրոնն ունի նախասրահ և հիմնական դահլիճ՝ համապատասխանաբար 41.6քմ և 78.7քմ չափերով (Տարածքի հատակագծերը և կտրվածքները կցվում են առաջադրանքին):
Սենյակների բարձրությունը կազմում է 6.5 մետր, ինչը, ըստ պատվիրատուի ցանկության, հնարավորություն է ընձեռում հիմնական սրահում ձևավորել անտրեսոլային հարկ՝ որպես գրադարան օգտագործելու համար: Այսուհանդերձ, անտրեսոլային հարկ առաջարկելիս պետք է նախատեսել այնպիսի կոնստրուկտիվ լուծումներ, որոնք շենքի կրող կոնստրուկցիաների համար անթույլատրելի լրացուցիչ բեռնվածք չեն առաջացնի:
Նկատի ունենալով այն հանգամանքը, որ ՀՀ կառավարության շենքը հանդիսանում է պատմամշակութային հուշարձան, դրա կոնստրուկտիվ տարրերի փոփոխություններ իրականացնելը ցանկալի չէ: Բացառություն է կազմում մամուլի սրահից դեպի անցագրային կետ դռան բացումը, որը պետք է ծառայի որպես մուտք լրագրողների համար: Այդ մասում ժամանակին եղել է դուռ, որը հետագայում փակվել է:
Մամուլի կենտրոնը պետք է ծառայի ոչ միայն ասուլիսների կազմակերպման նպատակին, այլև հանդիսանա տարբեր միջոցառումների և ոչ պաշտոնական քննարկումների կազմակերպման վայր՝ հագեցած էլեկտրոնային գրատախտակներով և տարբեր ցուցադրանքների հնարավորություններով:
Տարածքը պետք է հագեցած լինի արդիական սարքավորումներով և աշխատանքային մթնոլորտի ձևավորմանը նպաստող հարդարման տարրերով ու գունային լուծումներով:
Հայեցակարգում և էսքիզային նախագծում կարող են ներառվել նաև առաջարկություններ նախասրահի օգտագործման բնույթի և կահավորման վերաբերյալ:
