(010) 303-300
Ուսանողական խորհրդի նախաձեռնությամբ տեղի ունեցավ հանդիպում ռեկտոր Եղիազար Վարդանյանի հետ։ Հանդիպմանը ներկա էր ՃՇՀԱՀ աշխատակազմի ղեկավար, ուսանողական խորհրդի պատվավոր նախագահ Հովսեփ Հովեյանը, բոլոր ֆակուլտետների ուսանողական խորհուրդների և հանձնաժողովների ղեկավար կազմերը։
Հանդիպման սկզբում ներկաները մեկ րոպե լռությամբ հարգեցին 44-օրյա պատերազմի զոհերի հիշատակը, որից հետո ռեկտոր Ե․ Վարդանյանը իր ողջույնի խոսքն ուղղեց ուսանողական խորհրդի անդամներին,- «Նախ թույլ տվեք շնորհավորել ուսանողական խորհրդի նորընտիր նախագահին, վստահ եմ, որ այս կազմը հաջողություն կունենա, քանի որ բոլորիս նպատակը մեկն է՝ ունենալ որակյալ և արժանահավատ կրթություն մեր հայրենիքը հզորացնելու համար: Կոչ եմ անում լինել միասնական, համատեղել ուժերը մեր առջև ծառացած բոլոր մարտահրավերների հաղթահարման համար և հավատացած եղեք կունենանք նկատելի արդյունքներ»:
Հանդիպման ընթացքում քննարկվեցին ուսանողներին հուզող հարցերը, տարբերակներ առաջարկվեցին առաջնային խնդիրներին լուծում տալու համար՝ ուսման որակը բարձրացնելու նպատակով:
Քննարկվեցին նաև ստուգարքների և քննությունների անցկացման կարգի վերաբերյալ հարցեր, ուսանողները հետաքրքրվեցին համալսարանում իրականացվող առաջիկա ծրագրերի և միջոցառումների մասին։
Ուսանողական խորհրդի նախագահ Սուսաննա Հակոբյանը ողջ աշխատակազմի անունից շնորհակալություն հայտնեց հանդիպման համար և վստահեցրեց, որ ուսանողական խորհուրդը ջանք չի խնայի իր ներդրումը ունենալ այն բոլոր բարեփոխումներում, որը մատնանշեց ՃՇՀԱՀ ռեկտորը։
Ուսանողների կողմից հնչեցին բազմաթիվ հարցեր և առաջարկներ, որոնք մեծամասամբ ընդունվեցին։ Հանդիպումը տեղի ունեցավ անմիջական և ջերմ մթնոլորտում։
