ՃԱՐՏԱՐԱՊԵՏՈՒԹՅԱՆ ԵՎ ՇԻՆԱՐԱՐՈՒԹՅԱՆ ՀԱՅԱՍՏԱՆԻ ԱԶԳԱՅԻՆ ՀԱՄԱԼՍԱՐԱՆ

Հարգելի գործընկերներ

Հրավիրում ենք մասնակցելու 2019թ մայիսի 16-18-ը ք. Ծաղկաձորում  կայանալիք «Նորարարությունների կառավարում» V միջազգային երիտասարդական գիտական դպրոցին(այսուհետ`Դպրոց):

Դպրոցի նպատակն է  նպաստել տաղանդավոր երիտասարդ  գիտնականնների, հետազոտողների և ուսանողների միավորմանը, աջակցել երիտասարդության  նորարարական գործունեության մակարդակի և մասնագիտական իրազեկության բարձրացմանը, նրանց մոտ մտավոր գործունեության արդյունքների հիման վրա բիզնես գաղափարների  ձևավորման, նորարարական նախագծման և տեխնոլոգիաների փոխանցման հմտությունների մշակմանը:

Դպրոցի դասընթացի շրջանակներում մասնակիցները հնարավորություն կունենան ծանոթանալ բիզնես առաջարկների կազմման տեխնիկային, զարգացնել բիզնես նախագծերի արդյունավետ պլանավորման և կառավարման կարողություններ, ինչպես նաև տիրապետել մտավոր սեփականության օբյեկտների պահպանման ու կառավարման  հիմնային գիտելիքներին:

Դպրոցի ծրագրով երիտասարդ մասնակիցների համար նախատեսված են դասախոսություններ, վարպետության դասեր (master class) և բիզնես խաղեր, որոնք կվարեն նորարարական մենեջմենթի, նախագծերի կառավարման և մտավոր սեփականության իրավունքների պահպանման ոլորտների  հրավիրված առաջատար մասնագետներ և փորձագետներ:

Դպրոցին մասնակցության համար կարող են դիմել  մինչև  30 տարեկան երիտասարդ ուսանողներ, գիտնականներ, ասպիրատներ, գիտական աշխատողներ, սկսնակ ձեռներեցներ, ինչպես նաև նորարարական  ձեռներեցությամբ և մտավոր գործունեության արդյունքների առևտրայնացմամբ հետաքրքրված այլ անձիք:

Դպրոցին մասնակցելու  համար անհրաժեշտ է մինչև 2019թ. ապրիլի 29-ը ներառյալ լրացնել մասնակցության էլեկտրոնային հայտը  հետևյալ հղումով` http://bit.ly/2Ue00RP  .

Դպրոցի մասնակցության վճարը  կազմում է` 15 ԱՄՆ դոլար կամ ՀՀ դրամին համարժեք գումար` հաշվարկված  ընթացիկ փոխարժեքով: Դպրոցի անցկացման օրերին փոխադրման, կեցության և սննդի ծախսերը հոգում է կազմակերպիչը:

Դպրոցի մասնակիցների ընտրությունը կկայանա մրցութային հիմունքներով: Հավանության արժանացած հայտատուները մինչև սույն թվականի մայիսի 6-ը կստանան “Նորարարությունների կառավարում” V միջազգային երիտասարդական գիտական դպրոցին մասնակցելու էլեկտրոնային նամակ-հրավերը և մասնակցության վճարի կատարման կարգը: Հրավերը ստանալու օրվան հաջորդող  3 աշխատանքային օրվա ընթացքում անհրաժեշտ է  հաստատել մասնակցության մտադրությունը Դպրոցի innov.youth.school@gmail.com  էլեկտրոնային  հասցեին ուղարկելով տեղեկատվական նամակ  և կատարել մասնակցության վճարում:

“Նորարարությունների կառավարում” V միջազգային երիտասարդական գիտական դպրոցի վերաբերյալ մանրամասն տեղեկատվությանը  կարելի է ծանոթանալ միջոցառման ֆեյսբուքյան էջից` https//www.facebook.com/SchoolOfAYoungInnovator/  և Դպրոցի պաշտոնական կայքից հետևյալ հասցեով`https://yisango.wixsite.com/younginnov-arm/:  

Ծրագիրն իրականացվում է ՀՀ սպորտի և երիտասարդության հարցերի նախարարության ֆինանսական աջակցությամբ:

Հարգանքով`

Դպրոցի կազմկոմիտե