(010) 303-300
Հարգելի գործընկերներ, թանկագին բարեկամներ,
2020 թ. սեպտեմբերի 27-ից սահմանի շփման գծի ողջ երկայնքով ադրբեջանական կողմի հրետակոծության պատճառով թիրախավորվել են Արցախի խաղաղ բնակավայրերը, ներառյալ՝ մայրաքաղաք Ստեփանակերտը:
Սեպտեմբերի 28-ին Ադրբեջանական զինված ուժերի կողմից Գեղարքունիքի մարզի Վարդենիսի շրջանի զինվորական և քաղաքացիական ենթակառուցվածքներին հասցված հարվածի արդյունքում տուժել է նաև քաղաքացիական բնակչություն, կան զոհեր: Հակամարտությունն օրեցօր ընդլայնվում է՝ տանելով շատ մարդկանց կյանքեր:
Ադրբեջանի կողմից սանձազերծված լայնածավալ ռազմական գործողությունները ուղղակիորեն համակարգվում են Թուրքիայի կողմից և ուղղված են Արցախի Հանրապետության, Հայաստանի Հանրապետության խաղաղ բնակչության դեմ և տարածաշրջանում իրավիճակի ապակայունացմանը:
Ադրբեջանական կողմը, Արցախի և Հայաստանի տարածքը ռմբակոծելով միջազգային կոնվենցիաներով արգելված կասետային ռումբերով, տարբեր տրամաչափի զինատեսակներով, «ՏՕՍ» հրթիռահրետանային համակարգերով, հրահրում է լայնամասշտաբ պատերազմ:
Առանձնահատուկ անհանգստություն է առաջացնում Ադրբեջանի զինված ուժերի կազմում ծառայող թուրք մասնագետների, Սիրիայից և Լիբիայից Ադրբեջանի տարածք տեղափոխված վարձկան-ահաբեկիչների խմբավորումների մասնակցությունը ռազմական գործողություններում: Այս հաստատված փաստի մասին են բարձրաձայնում աշխարհի գերտերությունները՝ Ռուսաստանը, ԱՄՆ, Ֆրանսիան, Իրանը, միջազգային հանրությունն ու լրատվամիջոցները՝ կոչ անելով անհապաղ դադարեցնել հակամարտությունը և ձեռնպահ մնալ այն բորբոքելու քայլերից:
Ցավոք, ադրբեջանա-թուրքական ավերիչ պատերազմում զոհվածների թվում են Հայաստանի Հանրապետության բուհերի, նաև Ճարտարապետության և շինարարության Հայաստանի ազգային համալսարանի դասախոսներ, ուսանողներ, ովքեր կամավոր մեկնել են ռազմաճակատ՝ կենաց-մահու կռիվ էին մղում իրենց Հայրենիքի ապագայի համար:
Հարգելի գործընկերներ, Ճարտարապետության և շինարարության Հայաստանի ազգային համալսարանի պրոֆեսորադասախոսական կազմի, ուսանողների և անձամբ իմ անունից խնդրում ենք կոչով դիմել Ձեր և աշխարհի երկրների ղեկավարներին, միջազգային իրավասու կազմակերպություններին՝ խստագույնս դատապարտել Ադրբեջանի և Թուրքիայի կողմից՝ Սիրիայի և Լիբիայի ահաբեկիչ-վարձկանների մասնակցությանբ հրահրած կործանարար ռազմական գործողությունները, որոնք ոճրագործություն են թե´ Արցախի, թե´ Հայաստանի, և թե´ առաջադեմ մարդկության և քաղաքակրթության հանդեպ:
Լիահույս ենք, որ Ձեր գործուն աջակցությունը մեծապես կնպաստի դադարեցնելու արյունահեղությունը և խաղաղ ճանապարհով լուծելու տարածաշրջանային խնդիրները:
ՃՇՀԱՀ ռեկտորի ժ/պ, տ.գ.դ., պրոֆեսոր Եղիազար Վարդանյան
