(010) 303-300
Ցավով հայտնում ենք, որ 88 տարեկան հասակում կյանքից հեռացել է Նյութերի դիմադրության ամբիոնի դոցենտ, ֆիզիկամաթեմատիկական գիտությունների թեկնածու, համալսարանի երկարամյա աշխատակից Ջուլետտա Գևորգի Մուրադյանը,
Ջուլետտա Գևորգի Մուրադյանը շուրջ 64 տարի իր մասնագիտական գործունեությունը նվիրել է համալսարանին և կրթության զարգացման գործին։ Նա այն անհատներից էր, որոնց ամբողջ գիտամանկավարժական ուղին անբաժան էր գիտությանն ու կրթությանը ծառայելու գաղափարից։ 1959 թվականին ավարտելով Երևանի պետական համալսարանի ֆիզիկամաթեմատիկական ֆակուլտետի մեխանիկայի բաժինը՝ նա նույն տարում սկսեց իր աշխատանքային գործունեությունը և մինչև կյանքի վերջին տարիները շարունակեց աշխատել գիտական և կրթական ոլորտում։
Նրա մասնագիտական ուղին սերտորեն կապված էր մեխանիկայի և նյութերի դիմադրության բնագավառի հետ։ Տասնամյակներ շարունակ նա մեծ նվիրումով է դասավանդել, մասնակցել է ուսումնական ծրագրերի կատարելագործմանը, նպաստել ինժեներական կրթության որակի բարձրացմանը և իր գիտելիքներն ու փորձը փոխանցել ուսանողների բազմաթիվ սերունդների։
Ջուլետտա Մուրադյանի գիտական հետաքրքրությունների հիմնական ուղղությունը պինդ դեֆորմացվող մարմինների մեխանիկան էր՝ մասնավորապես առաձգականության տեսության հարթ խնդիրների ուսումնասիրությունը անհամասեռ և անիզոտրոպ նյութերի համար։ Այդ ոլորտում նրա կատարած հետազոտությունները արտացոլվել են գիտական հոդվածներում և մեթոդական աշխատանքներում, որոնք կարևոր ներդրում են ունեցել թե՛ ուսումնական գործընթացի կազմակերպման, թե՛ գիտահետազոտական աշխատանքների զարգացման գործում։
1987 թվականին պաշտպանելով թեկնածուական ատենախոսությունը՝ նա շարունակեց իր գործունեությունը որպես դոցենտ՝ մշտապես հավատարիմ մնալով մասնագիտական բարձր չափանիշներին և մանկավարժական պատասխանատվությանը։
Հատկապես արժևորվում է այն փաստը, որ Ջուլետտա Գևորգի Մուրադյանը շուրջ վեց տասնամյակ շարունակ իր աշխատանքային և ստեղծագործական կյանքը կապել է նույն կրթական հաստատության հետ՝ դառնալով համալսարանի գիտակրթական միջավայրի կայացման և շարունակական զարգացման կենդանի մասնակիցը։
Նրա անունը կմնա համալսարանի պատմության մեջ որպես նվիրված գիտնական, պահանջկոտ ու հոգատար դասախոս և արժանապատիվ մարդ, որի թողած մասնագիտական ժառանգությունը և մարդկային օրինակն այսօր էլ շարունակում են ներշնչել գործընկերներին ու ուսանողներին։
