(010) 303-300
Սիրելի համալսարանականներ.
Շնորհավորում եմ Ձեզ՝ Ամանորի և Սուրբ ծննդյան տոների կապակցությամբ: Տարին ամփոփելով՝ կարող եմ վստահ ասել, որ 2016թ-ը Ճարտարապետության և շինարարության Հայաստանի ազգային համալսարանում կայացած էր. տոնեցինք մեր սիրելի համալսարանի 95 ամյակը, ունեցանք բազմաթիվ ձեռքբերումներ, դրեցինք համագործակցության և ավելի լավ ապագայի հուսալի հիմքեր: Եվ այս ամենը՝ ի շնորհիվ մեր մեծ ընտանիքի յուրաքանչյուր անդամի:
Սիրելի ուսանողներ.
Ամեն անցնող տարի նշանակում է ավելի շատ գիտելիքներ, հուսալի ու լուսավոր ապագայի ավելի շատ նախադրյալներ, խելացի ու ազնիվ քաղաքացի լինելու ավելի շատ հնարավորություններ: Մաղթում եմ, որ Նոր տարում դուք գտնեք այն ամենն, ինչ փնտրում եք, գտնեք այն բոլոր ուղիները, որոնք կմոտեցնեն Ձեզ ձեր նպատակներին՝ լինեն դրանք անձնական թե աշխատանքային:
Դիմավորենք Ամանորը՝ հույսով, որ այն մեր երկրի համար կլինի առողջության, հաջողության, խաղաղության, վերելքների ու հաղթանակների տարի:
