(010) 303-300
ՃԱՐՏԱՐԱՊԵՏՈՒԹՅԱՆ ԵՎ ՇԻՆԱՐԱՐՈՒԹՅԱՆ ՀԱՅԱՍՏԱՆԻ ԱԶԳԱՅԻՆ ՀԱՄԱԼՍԱՐԱՆ
100-ամյա պատմություն ունեցող համալսարան
Կայացավ ուսանողների գործնական աշխատանքների ցուցահանդեսը, որն ընդգրկում էր Ճարտարապետության տեսության, պատմաճարտարապետական ժառանգության վերականգնման և վերակառուցման, գեղեցիկ արվեստի և պատմության ամբիոնի «Ծավալատարածական հորինվածք», «Ճարտարապետական նախագծման հիմունքներ» և «Գունագիտություն» դասընթացները:
Ցուցահանդեսը նվիրված էր Ճարտարապետության և շինարարության Հայաստանի ազգային համալսարանի 100-ամյակին:
Ճարտարապետության տեսության, պատմաճարտարապետական ժառանգության վերականգնման և վերակառուցման, գեղեցիկ արվեստի և պատմության ամբիոնի վարիչ Է. Հարությունյանը շնորհակալություն հայտնեց ներկաներին՝ տեղեկացնելով, որ ներկայացված են առաջին կուրսի ուսանողների աշխատանքները այն առարկաների շրջանակում, որոնք «ճարտարապետություն» մասնագիտության հիմնաքարն են:
ՃՇՀԱՀ ռեկտոր Ե. Վարդանյանը, ցուցահանդեսի բացման արարողությանը ողջունելով բոլորին, շնորհավորեց գեղեցիկ միջոցառման առթիվ. «Հարգելի՛ տիկին Հարությունյան, առաջին հերթին ողջունում եմ Ձեզ և ամբիոնի այն բոլոր աշխատակիցներին, որոնք ջանք ու եռանդ չեն խնայել նման միջոցառման կայացման գործում: Ցանկանում եմ նաև շնորհակալություն հայտնել ուսանողներին՝ գեղեցիկ աշխատանքներ ներկայացնելու համար: Ուզում եմ ընդգծել, որ ուսանողների աշխատանքը արդյունավետ ու լավ կլինի, եթե համագործակցաբար աշխատեն իրենց ղեկավարների հետ, հետևաբար ուզում եմ շնորհակալություն հայտնել բոլոր ղեկավարներին: Մենք պետք է պարբերաբար կազմակերպենք նմանօրինակ միջոցառումներ. դրանք առանձնահատուկ գույն են տալիս ուսանողական առօրյային՝
կարևոր դեր կատարելով նրանց մասնագիտական կայացման, համագործակցային հմտությունների զարգացման գործընթացում»:
Միջոցառմանը երաժշտական համարներով ելույթ ունեցավ ՃՇՀԱՀ բենդը՝ գեղեցիկ կատարումներով ամբողջացնելով ցուցահանդեսը, որը կգործի մինչև մայիսի 31-ը:
