Երևանի Մ. Աբեղյանի անվան թ. 3  դպրոցը   հիմնադրվել է 1933 թվականին: Մինչև 1944 թվականը դպրոցը եղել է  Գ. Ասրիևի  անվան, իսկ   այդ    թվականից` Մ. Աբեղյանի մահվանից հետո, այն  վերանվանվել է  մեծ  հայագետի անունով:

Դպրոցի պատմության մեջ շրջադարձային է եղել 1960-ական թվականների սկիզբը, երբ դպրոցի` այդ ժամանակվա տնօրեն Ս. Բոշյանի նախաձեռնությամբ կրթօջախում սկիզբ է դրվել մաթեմատիկայի խորացված ուսուցմանը: Այդ առիթով 1962 թվականին դպրոցում աշխատանքի է անցել մաթմատիկայի ականավոր ուսուցիչ Սամսոն Դաղբաշյանը, որը հետագայում դարձավ Խորհրդային  Միության այն եզակի մանկավարժներից մեկը, որոնք համատեղում էին պետական երկու բարձրագույն կոչում` ԽՍՀՄ ժողովրդական  ուսուցիչ և Սոցիալիստական աշխատանքի հերոս:

Կրթօջախը, որը մաթեմատիկայի թեքումով առաջին դպրոցն էր հանրապետությունում, հետագա  տարիներին մեծ նպաստ բերեց բնական գիտությունների, հատկապես մաթեմատիկայի  և ֆիզիկայի, զարգացմանը: 20-րդ դարավերջի հայ մաթեմատիկոսների և ֆիզիկոսների մի զգալի մասը նախնական կրթությունը ստացել է  Մ. Աբեղյանի  անվան թ.  3  դպրոցում: Այս դպրոցն է ավարտել նաև ՀՀ նախկին վարչապետ Անդրանիկ Մարգարյանը:

 ՀՀ կառավարության 2010թ. մայիսի 6-ի  Հ 575-Ն  որոշումով կրթօջախը դարձավ ավագ դպրոց: 2010-2011  ուսումնական տարում դպրոցում բացվեցին 3 բնագիտամաթեմատիկական, 2 հումանիտար  և 2 ընդհանուր  հոսքի դասարաններ, որոնցում սովորում  էր  135 աշակերտ: Դպրոցի և Ճարտարապետության և շինարարության Հայաստանի ազգային համալսարանի միջև 2011թ. մարտի 1-ին կնքվեց համագործակցության պայմանագիր, որով սկիզբ առավ կրթօջախի նոր վերածնունդը: Համալսարանի միջոցներով հիմնավերանորոգվում է  դպրոցի գլխավոր մասնաշենքը, որը նման ծավալներով և որակով երբեք չի նորոգվել:

Համալսարանի նախաձեռնությամբ և օժանդակությամբ 2011-2012  ուստարում դպրոցում բացվեց  8  10-րդ  դասարան, որոնցից  7-ը` բնագիտամաթեմատիկական,  1-ը` ընդհանուր հոսքի:  10-րդ դասարաններում ուստարվա սկզբին սովորում էր 151 աշակերտ:  1-ին կիսամյակի ընթացքում նոր  աշակերտների  ներհոսքը շարունակվում է: Բնագիտամաթեմատիկական հոսքի դասարանները ձևավորվել  են 5 ենթահոսքերով` ֆիզիկամաթեմատիկական, հաշվողական տեխնիկայի և ինֆորմատիկայի /2-ական դասարան/, տնտեսագիտական, ճարտարապետության, դիզայնի /1-ական դասարան/:  Համապատասխան դասարաններում դասավանդվում են լրացուցիչ առարկաներ` նկարչություն գծագրություն, տնտեսագիտության  հիմունքներ:

2011-2012 ուստարում դպրոցի ուսուցչական կազմը համալրվեց համալսարանի դասախոսական ուժերով: Դպրոցի աշակերտների համար համալսարանը անվճար կազմակերպում է  ամենատարբեր մշակութային և մարզական միջոցառումներ, էքսկուրսիաներ, մարզական և առարկայական լրացուցիչ  խմբակային  պարապմունքներ:

 Աշխատակազմը

8,878  Ընդամենը Դիտված, 212 Դիտվել է այսօր